အသောကရဲ့ အက္ခရာများ (နောက်ဆက်တွဲ-၂)

ကလိင်္ဂဟာ အသောကသမိုင်းမှာ ထူးခြားတဲ့ နေရာတစ်ခုပါ။ စစ်နဲ့ ငြိမ်းချမ်းရေးတို့ရဲ့ မွေးဖွားရာဒေသတစ်ခုလို့ ဆိုနိုင်ပါတယ်။ အဲဒီဒေသမှာ အသောကဘုရင်ဟာ ကျောက်စာ နှစ်ခု ရေးထိုးခဲ့တယ်။


အသောကရဲ့ အက္ခရာများ (၁) ကနေ (၁၄) အထိကို Ginar, Kalsi, Yerragudi, Sopara ၊ Shahbazarhi, Mansehra ဒေသတွေမှာ ရေးထိုးထားတာကို တွေ့ရပေမယ့် Dhauliနဲ့ Jaugada ဒေသနှစ်ခုမှာတော့ (၁) ကနေ (၁၀) အထိ, (၁၄), ပြီးတော့ (၁၅)နဲ့ (၁၆)ကို ရေးထိုးထားတာပါ။ ဒါကြောင့် (၁၅)နဲ့ (၁၆)ကို သီးခြားကျောက်ဆောင်စာလို့ ခေါ်ကြတယ်။ ကလိင်္ဂတိုင်းမှာ ရေးထိုးထားလို့ ကလိင်္ဂကျောက်စာလို့လဲ ခေါ်ကြသေးတယ်။ မှတ်သားစရာ တစ်ခုက ကလိင်္ဂတိုင်းထဲမှာ ရေးထိုးထားတဲ့ ကျောက်စာတွေမှာ ကလိင်္ဂစစ်ပွဲအကြောင်း ရေးထားတဲ့ (၁၃) မပါတာပါပဲ။ စဉ်းစားစရာပေ့ာနော။ ကလိင်္ဂစစ်ပွဲအကြောင်းတွေကို ကလိင်္ဂတိုင်းမှာ ကျောက်စာရေးထိုးခဲ့မယ်ဆိုရင် နိုင်ငံရေးအရ မိုက်မဲတဲ့ အပြုအမူမျိုး ဖြစ်နိုင်တဲ့အတွက် (၁၃)ကို ချန်ထားခဲ့တာလို့ အသောကသမိုင်း ကျွမ်းကျင်သူတစ်ချို့က ဆိုကြတယ်။ ဒါကြောင့်လဲ အသောကဓမ္မကို ရာဇဓမ္မလို့ ခေါ်ကြတာဖြစ်မယ်။

Kalinga Rock Edict (Dhauli)

ခရီးထွက်ဖို့ ပြင်နေတာ အတော်ကြာပြီ။ ဘယ်မှလဲ မသွားဖြစ်ဘူး။ မသွားနိုင်တာလဲပါတယ်။ ဒီနှစ်ဆောင်းတွင်းတော့ စိတ်ကူးထားတယ်။ အိန္ဒိယတလွှားက အသောကရဲ့ အက္ခရာတွေကို လိုက်လံဖတ်ရှုဖို့ပါ။ တစ်ချို့ကျောက်စာတွေ ရှိတဲ့နေရာကိုတော့ ရောက်ဖူးပြီးပြီ။ နီပေါက “လုမ္ဗိနီ”, အိန္ဒိယက “ဗာရာဏသီ”နဲ့ “ဆန်ချီ”ပါ။ ပါကစ္စတန်ကိုတော့ ဆရာသမားက သွားခိုင်းတာတောင် လုံခြုံရေးစိတ်မချတာနဲ့ ကြောက်လို့ မရောက်ဖြစ်ဘူး။ အဟဲ..Indiana Jonesနဲ့တော့ နင်လားငါလားပေါ့။ နီးနီးနားနားမှာလဲ အသောကကျောက်စာတွေ ရှိပါ့။ ကျောက်စာတိုင်ဆိုရင် အခု နေတဲ့နေရာကနေ နာရီဝက်လောက် လမ်းလျှောက်သွားရင် ရောက်တယ်။ ကျောက်ဆောင်စာရှိတဲ့ နေရာကိုတော့ တစ်နာရီလောက် ကားစီးသွားရင် ရောက်တယ်။ အဲဒီကျောက်စာတွေအကြောင်း နောက်ပိုစ့်တွေမှာ ရေးတာပေါ့။